العروض التقديمية من اهم المهارات اللى من المفروض نجيدها لكن بتواجهنا بعض الصعوبات , فى المقال ده هاتكلم عن تجاربى الشخصية مع العروض مش هاوجع دماغكوا بكلام ممكن تقروه فى اى مكان , ممكن تتعلم الأساسيات من الموقع :
http://www.effective-public-speaking.com/
اما عن الأشياء اللى المفروض تاخد بالك منها فى اى عرض تقديمى :
1- نصائح عامة :
جمهور العرض مش هايفتكر غير 3 معلومات اساسية فقط .. ابنى عرضك على 3 افكار فقط مع افكار صغيرة منبثقة.
حدد نوع العرض (عرض منتج - عرض تقنى) و زمن العرض و أداواتك قبل العرض.
اعمل بروفة للعرض عشان تتعود ممكن مع اصحابك او العائلة او حتى سجل لنفسك فيديو.
2 - شرائح العرض (PowerPoint slides) :
كل البنى آدمين بيختارو باور بوينت .. فيها ايه لو انت تبقى مختلف ؟ دور عن اى برنامج للعروض التقديمية فيه خصائص تلفت الإنتباه... استخدم عقلك و جوجل بخصوص الموضوع ده
الشرائح لازم فيها غلاف عليه اسم العرض
تانى شريحة على طول اجندة فيها النقاط اللى هاتتكلم عنها
آخر شريحتين فيها للأسئلة و شكر للجمهور
اختار الوان جميلة و متناسقة ابعد عن الألوان اللى العين حساسة ليها زى الألوان الأساسية الأحمر - الازرق - الإسود - الأخضر الأصفر .. العين لازم تبقى مرتاحة .. يعنى لو هاتستخدم احمر خليه نبيتى لو ازرق خليه كحلى لو اصفر خليه برتقالى هادىء و هكذى
الشرائح على هيئة نقاط زى المقال ده كده و النقاط مختصرة
بعد ماتخلص الشرائح راجع عليهم للأخطاء الإملائية
الصورة تغنى عن الف كلمة ... خليها حلقة فى ودنك
3- تقديم العرض :
الصوت لازم يكون عالى وواضح (ماتأفورش و تزعق جامد يعنى - ولا تتكلم فى سرك )
خليك واثق فى نفسك جدآ .. انت اللى فاهم الموضوع و اللى قدامك بيحاول يفهم منك بالإضافة انه مش بياكل عيال صغيرين.
فى ناس بتبقى خايفين و مرتبكين .. اتخلص من احساس الخوف.. بدله بأى حاجة تانية .. حزن , غضب , حماس .. انا عن نفسى بعمل عبيط .. ايه يعنى اللى ممكن يحصل لو غلطت ؟ ولا حاجة .
ماتقطعش اشعة الداتا شو أبــــــــــدآ .. ظلك مايقعش على السلايد خالــــــــــــــص
اتخلص من اللزمات اللغوية زى (تمام , ماشى , مفهوم , اوكى ) يفضل تسيبهم فى البيت.
حركات ايدك تبقى معبرة ( مش اوفر - مش رابطهم جنبك او وراك)
اتدرب اتدرب اتدرب اتدرب اتدرب
4- الإجابة على الأسئلة :
عادة الأسئلة بتخلى قلبك يقع فى رجلك .. ده طبيعى .. لو عارف السؤال جاوب بطريقة بسيطة و واضحة .. مش عارفه اتهرب .. اسأل لو فى حد عارف الإجابة (قال يعنى الأمر بديهى) اسسأله عن ايه ممكن تكون إجابة سؤاله .. فى طرق كتير .. خليك مبدع بس . "ممكن تقوله السؤال ده من برة المنهج" و تضحك .
بعد إجابة أى سؤال اتأكد من السائل ان دى اجابة سؤاله .
5- التنسيق بين أفراد العرض :
اعرف الوقت و عدد السلايدز و اقسم الأتنين تعرف كل سلايد هياخد وقت قد ايه.
اختاروا واحد مقدم اساسى يبدأ العرض و يوصل بين الأفراد
كل واحد بيلتزم بالوقت الخاص بيه المقدم الأساسى دايمآ ينبه المقدم قبل انتهاء وقته بدقيقة (ماتعملش هليلة .. اتفقوا على حركة بسيطة بينكوا)
لو فرد ارتبك يقول جملة محفوظة زى (و زمينا هايقول التفاصيل ) او لو قفلت خالص ينزل بهدوء و المقدم الأساسى يجذب الأنتباه و يكمل .
و ككلمة اخيرة .. مش تفاجىء نفسك بحاجة ابدآ .. اذا كنت هاتجرب برنامج و هاتدخل مدخلات لازم تكون مجهزها و مجربها قبلها عشان تضمن النتائج لو هاتدور عن موضوع فى جوجل فى وسط العرض لازم تكون دروت قبل كده بنفس الكلمة و عارف هاتدخل على ايه .. المفاجآت مش لطيفة فى الحالات دى .
العروض التقديمية عامة بتعتمد فى الأساس على موهبة الحديث و الكاريزما للمقدم و الثقة بالنفس .. و فى قواعد كتيير جدآ الواحد يعتمد عليها لتقديم عرض لكن دول الأهم من ملاحظتى لأخطائى و اخطاء زملائى و العروض اللى شفتها فى مؤتمر جوجل ..
ليست هناك تعليقات:
إرسال تعليق